一文看清環聯信貸評級

申請信用卡或者買樓按揭嗰陣，成日都聽到要查申請人嘅信貸評級。咁究竟信貸評級係乜嘢？對信貸評級日常生活有幾重要？點樣先至可以提升自己嘅信貸評級？

信貸評級係Ｄ乜？

信貸評級簡單嚟講，就係評估一個人喺財務上係咪信得過。呢個評級好重要，因為銀行或者財務公司會睇申請人嘅信貸評級，嚟決定批唔批各種申請，更關乎批出借貸嘅息口有幾高。

信貸評級點樣計算？

而家全港只有環聯信貸公司提供信貸評級服務。環聯會根據以下幾個因素嚟評估：

信貸帳戶種類：包括信用卡、按揭、貸款等。
還款紀錄：準時還款好重要，遲還或者唔還都會影響評級。
信貸紀錄長短：信用歷史越長越好，因為顯示你有穩定嘅財務行為。
總結餘：你欠嘅錢同你可以借嘅錢比例。
新開立信貸帳戶：短時間內開多個新帳戶會影響評級，因為可能顯示你急需錢。

信貸評級有幾級？

信貸評級分為A至J共10級，A至C級屬於良好，而I至J級就比較差。呢啲評級會影響你申請信用卡、按揭同貸款嘅結果，對你嘅日常生活好有關係。

如果發現自己嘅信貸評級唔高，係咪即係要長期捱高息呢？其實唔一定嘅。信貸評級會隨住你嘅財務行為而改變，所以最重要係改善你嘅信貸習慣。例如，唔論係信用卡定係其他貸款，都要記得準時還款；除咗唔好「碌爆卡」，仲要確保你嘅信用卡使用率（即係用咗幾多信用額）保持喺30-50%之內。如果你能夠養成好嘅信貸習慣，大概六個月時間，你嘅信貸評級好有可能會提升㗎。

點樣提升信貸評級？

如果你嘅信貸評級唔夠靚，有無方法可以升呢？以下有幾個貼士：

1. 準時還款及繳清款項

還款紀錄會直接影響信貸評級，所以準時還錢好重要。可以考慮用自動轉賬嚟避免遲交錢。如果每次只還最低還款額，財務機構會懷疑你嘅還款能力，咁就會影響信貸評級。

2. 避免同時申請多張信用卡

短時間內申請多張信用卡會令人覺得你急需大量信用額，係咪財務出現咗問題？呢樣嘢會影響信貸評級。

3. 使用信用額唔好過半

環聯建議每張信用卡最多使用約50%嘅信用額，咁就可以減少被質疑你嘅消費習慣同財務情況嘅機會。

4. 建立適量信貸帳戶

雖然要小心使用信用卡，但有卡比無卡好。完全冇信用卡會令你冇任何信貸紀錄，銀行或者財務公司就無從參考。

信貸評級係你財務健康嘅一個重要指標，了解點樣計算同點樣提升信貸評級，對你申請貸款或者信用卡都有好大幫助。希望呢篇文章可以幫到你更好咁管理自己嘅信貸評級。